【明報專訊】今屆歐聯相信係近年最冇睇頭，唔單止因為曼聯同車路士合演一年起碼睇幾次嘅英超決賽，而且傳統勁旅暮氣沉沉，又唔見前兩季維拉利爾、燕豪芬等黑馬予人驚喜，周師奶寧願睇聖火好過睇歐聯，起碼叫做機會難逢。
英超雄霸球壇，只怪其他聯賽球隊唔爭氣，曾被稱為全歐洲攻力最強嘅巴塞隆拿，美斯復出都谷唔起，最慘係班球員好似無心戀戰，比兩年前奪得歐聯嘅氣勢差天共地。
曾經威盡歐聯嘅AC米蘭季尾先發力，只怕為時已晚，餘下3場聯賽除要自己贏晒外仲要望費倫天拿失分，真係談何容易！感情上周師奶的確係支持AC可以踢下屆歐聯，雖則呢支意甲班霸成日畀人批評係老人隊，但季尾係靠老將恩沙基入球停不了才重燃殿軍望，證明老人家只要識得調節體力，唔好似朗拿度咁樣沉迷色慾，依然係無價寶。始終國米球員喺淘汰賽關頭心煩氣躁，羅馬後備兵源不足，經驗豐富嘅AC依然係為意甲爭光首選。費倫天拿喺歐洲足協盃4強互射12碼出局，體力與士氣受挫，作客要護級嘅卡利亞里，有失分危機。至於今晚冇意甲，周師奶轉吓口味玩英超，保頓同新特蘭總算脫離降班區域，和波對大家都有着數，3.5倍抵玩，不捧待何時？
■周師奶推介
星期六49 保頓 Vs 新特蘭
主客和：和局（3.5倍）
周師奶
